აზერბაიჯანი და თურქეთი ერთობლივი ენერგეტიკული პროექტების განხორციელების დაჩქარებაზე შეთანხმდნენ.

როგორც Report იუწყება, ამის შესახებ აზერბაიჯანის ენერგეტიკის მინისტრმა ფარვიზ შაჰბაზოვმა სოციალურ ქსელ X-ზე საკუთარ გვერდზე დაწერა.

„სტამბოლში თურქეთის ენერგეტიკისა და ბუნებრივი რესურსების მინისტრ ალფარსლან ბაირაქტართან ერთად ჩვენი ენერგეტიკული თანამშრომლობის ახალი ეტაპი განვიხილეთ. მიღწეულია შეთანხმება პროექტების — „აზერბაიჯანის (ნახიჩევანის)–თურქეთის ენერგეტიკული ინტერკონექტორის“ და „აზერბაიჯანი–საქართველო–თურქეთი–ბულგარეთის მწვანე ენერგიის დერეფნის“ — განხორციელების დაჩქარების შესახებ. გარდა ამისა, განვიხილეთ თანამშრომლობის შესაძლებლობები პროექტის „კასპიის ზღვა–შავი ზღვა–ევროპა: მწვანე ენერგიის დერეფანი“ ფარგლებში. ენერგეტიკული კავშირების სფეროში ეს რეგიონული პროექტები ჩვენი მორიგი ერთობლივი წვლილი იქნება ენერგეტიკული უსაფრთხოების გაძლიერებაში“, — აღნიშნა მინისტრმა.

აზერბაიჯანის ენერგეტიკის სამინისტროს ინფორმაციით, შეხვედრაზე გამოითქვა კმაყოფილება ორ ქვეყანას შორის სტრატეგიული ენერგეტიკული პარტნიორობის ყველა მიმართულებით განვითარებით. აღინიშნა, რომ ორი სახელმწიფოს ლიდერების პოლიტიკურმა ნებამ და მხარდაჭერამ გადამწყვეტი როლი შეასრულა ენერგეტიკის სფეროში ისეთი მნიშვნელოვანი პროექტების განხორციელებაში, როგორიცაა ბაქო–თბილისი–ჯეიჰანის ნავთობსადენი და TANAP-ის გაზსადენი.

შეხვედრის ფარგლებში განიხილეს თურქეთის სამეცნიერო და ტექნოლოგიური კვლევების საბჭოს (TÜBİTAK) მიერ აზერბაიჯანის (ნახიჩევანის)–თურქეთის ენერგეტიკული ინტერკონექტორის პროექტთან დაკავშირებით ჩატარებული კვლევების შედეგები. აღინიშნა, რომ პირველ ეტაპზე პერსპექტიულია ნახიჩევანიდან თურქეთში 1 გიგავატი სიმძლავრის ელექტროენერგიის გადაცემა. ასევე ხაზი გაესვა იმას, რომ მომავალში პროექტი თურქეთისთვის ელექტროენერგიის მიწოდების შესაძლებლობას შექმნის არა მხოლოდ აზერბაიჯანიდან, არამედ ცენტრალური აზიიდანაც. შეფასდა აზერბაიჯანელი და თურქი ინვესტორების მიერ პროექტის განხორციელებაში მონაწილეობის პერსპექტივები.

გარდა ამისა, მხარეებმა განიხილეს ხელშეკრულებით-სამართლებრივი ბაზის გაძლიერება, ტექნიკურ-ეკონომიკური დასაბუთების მომზადება და აზერბაიჯანს, საქართველოს, თურქეთსა და ბულგარეთს შორის მწვანე ელექტროენერგიის გადაცემისა და ვაჭრობის პროექტის ფარგლებში ერთობლივი საწარმოს შექმნა. მიღწეულია შეთანხმება აღნიშნული პროექტის განხორციელების დაჩქარების შესახებ.

ასევე, შეხვედრის მონაწილეებს მიაწოდეს ინფორმაცია პროექტის „კასპიის ზღვა–შავი ზღვა–ევროპა: მწვანე ენერგიის დერეფანი“ ტექნიკურ-ეკონომიკური დასაბუთების შედეგების შესახებ და განიხილეს ამ ინიციატივის ფარგლებში თურქეთთან თანამშრომლობის შესაძლებლობები.

მოლაპარაკებების ფარგლებში ასევე გაიმართა აზრთა გაცვლა თურქეთში COP31-ის ჩატარების საკითხებზე და „აზერბაიჯანულ-თურქული ენერგეტიკული ფორუმის“ მორიგი სხდომის ფარგლებში შემდგომი თანამშრომლობის შესახებ.