26 აგვისტოს ბაქოში ბილგიასის ხელოვნების სკოლის გახსნის ცერემონია გაიმართა.

როგორც Report იუწყება, გახსნის ღონისძიებაში მონაწილეობდნენ აზერბაიჯანის რესპუბლიკის პირველი ვიცე-პრეზიდენტი, ჰეიდარ ალიევის ფონდის პრეზიდენტი მეჰრიბან ალიევა და მისი ქალიშვილი არზუ ალიევა.

კულტურის მინისტრმა ადილ კერიმლიმ ხელოვნების სკოლაში ჩატარებული სამუშაოების შესახებ მეჰრიბან ალიევას ინფორმაცია მიაწოდა.

როგორც აღინიშნა, ხელოვნების სკოლა შეიქმნა ბილგიასის დასახლების კულტურის სახლის, №27 საბავშვო მუსიკალური სკოლისა და საბუნჩის რაიონის ცენტრალიზებული საბიბლიოთეკო სისტემის №10 ბიბლიოთეკის ფილიალის საქმიანობის ოპტიმიზაციის შედეგად.

აღსანიშნავია, რომ ბილგიასის დასახლების კულტურის სახლის ადმინისტრაციული შენობა 1987 წელს აშენდა. წლების განმავლობაში შენობა მოძველდა და ექსპლუატაციისთვის უვარგისი გახდა. სწორედ ამიტომ ჰეიდარ ალიევის ფონდმა 220 მოსწავლეზე გათვლილი სკოლის ახალი შენობა ააშენა.

სასწავლებლის შენობაში, რომელიც აღჭურვილია საჭირო ავეჯითა და ტექნიკით, ასევე თვალსაჩინო სასწავლო მასალებით, განთავსებულია მუსიკის, თეორიის, ქოროს, ფოტოგრაფიის, ფერწერის, ქანდაკების და დიზაინის ოთახები, ქორეოგრაფიისთვის განკუთვნილი დარბაზი და სააქტო დარბაზი, გასახდელი, ბიბლიოთეკა და სასადილო.

ასევე მოეწყო და გამწვანდა სკოლის მიმდებარე ეზო.