BP-მ გაზის კონდენსატის საბადოზე „შაჰდენიზი“ 2,9 მილიარდი დოლარის ღირებულების „შაჰდენიზის კომპრესიის“ (ŞDK) პროექტის ფარგლებში საზღვაო სამშენებლო სამუშაოები დაიწყო.

ამის შესახებ Report BP Azerbaijan-ზე დაყრდნობით იუწყება.

ბოლო რამდენიმე კვირის განმავლობაში წარმატებით დასრულდა ოთხი მილოვანი ხიმინჯის ტრანსპორტირება და მონტაჟი, რომლებიც ŞDK-ის პლატფორმის საყრდენი ბლოკის საფუძველი გახდება. სამუშაოები წყალქვეშა სამშენებლო გემის „ხანკენდის“ დახმარებით შესრულდა.

თითოეული ხიმინჯის სიგრძე დაახლოებით 70 მეტრია, დიამეტრი — 108 დუიმი, ხოლო წონა — 292 ტონა. ეს ყველაზე დიდი დიამეტრის მქონე მილოვანი ხიმინჯებია, რომლებიც BP-ს კასპიის ზღვაში ოდესმე დაუმონტაჟებია.

მონტაჟის დროს ხიმინჯების მდგრადობისა და ვერტიკალური მდგომარეობის უზრუნველსაყოფად გამოყენებული იყო სპეციალურად დამზადებული 188 ტონის წყალქვეშა საყრდენი ფილა. გარდა ამისა, ამ სამუშაოების ფარგლებში BP-მ რეგიონში თავისი ოპერაციების ისტორიაში პირველად გამოიყენა ხიმინჯების საცობების მონტაჟის ტექნოლოგია.

„ამ ეტაპის დასრულება საფუძველს ქმნის ŞDK-ის პლატფორმის საყრდენი ბლოკის 2028 წლის პირველ ნახევარში დამონტაჟებისთვის“, — ნათქვამია BP-ის განცხადებაში.

აღსანიშნავია, რომ ŞDK-ის პროექტის მთავარი მიზანია „შაჰდენიზის“ საბადოზე დაბალი წნევის გაზის მარაგების მოპოვების უზრუნველყოფა და საბადოზე გაზის ამოღების კოეფიციენტის გაზრდა. პროექტის ფარგლებში დაგეგმილია დამატებით დაახლოებით 50 მილიარდი კუბური მეტრი გაზისა და დაახლოებით 25 მილიონი ბარელი კონდენსატის მოპოვება და ექსპორტი.

პროექტი ითვალისწინებს ელექტროენერგიაზე მომუშავე, ძირითადად უპერსონალო კომპრესორული პლატფორმის მშენებლობას 85 მეტრის სიღრმეზე, მოქმედი „შაჰდენიზ ბრავოს“ პლატფორმიდან დაახლოებით 3 კილომეტრში. პლატფორმაზე დამონტაჟდება ოთხი კომპრესორი, თითოეულის სიმძლავრე 11 მეგავატი იქნება.

ახალი დანადგარი უზრუნველყოფს „შაჰდენიზ ალფასა“ და „შაჰდენიზ ბრავოს“ პლატფორმებიდან მოპოვებული გაზის შეკუმშვას სანღაჩალის სახმელეთო ტერმინალში გაგზავნამდე.

პროექტის ფარგლებში სამშენებლო სამუშაოების დასრულება 2029 წლისთვის იგეგმება. მოსალოდნელია, რომ ŞDK-ის პლატფორმა „შაჰდენიზ ალფადან“ მოპოვებული გაზის შეკუმშვისთვის 2029 წელს, ხოლო „შაჰდენიზ ბრავოდან“ მოპოვებული გაზის შეკუმშვისთვის — 2030 წელს იქნება მზად.