მშვიდობიანი კავკასიის მედია — დამოუკიდებელი ამბები საქართველოსა და რეგიონიდან.
სომხეთის საგარეო საქმეთა და საერთაშორისო ვაჭრობის მინისტრის, არარატ მირზოიანის შეფასებით, ირანში კმაყოფილები არიან TRIPP-ის ირგვლივ სომხეთის მიერ გამოვლენილი გამჭვირვალობით, საკითხების განხილვის მზადყოფნითა და პროექტის ეკონომიკური შესაძლებლობებით. როგორც „არმენპრესი“
სომხეთის საგარეო საქმეთა და საერთაშორისო ვაჭრობის მინისტრის, არარატ მირზოიანის შეფასებით, ირანში კმაყოფილები არიან TRIPP-ის ირგვლივ სომხეთის მიერ გამოვლენილი გამჭვირვალობით, საკითხების განხილვის მზადყოფნითა და პროექტის ეკონომიკური შესაძლებლობებით. როგორც „არმენპრესი“ იუწყება, ამის შესახებ მირზოიანმა ეროვნულ ასამბლეაში მთავრობის საათის დროს, დეპუტატ არუსიაკ მანავაზიანის კითხვაზე პასუხისას განაცხადა, რომელიც ირანში მის ვიზიტსა და ირანული მხარის მიერ TRIPP-ის აღქმას შეეხებოდა.
„ირანში კმაყოფილები არიან იმ იდეალური გამჭვირვალობით, რომელსაც ჩვენი მხრიდან TRIPP-ის ირგვლივ მიმდინარე მთელ პროცესთან დაკავშირებით ვავლენთ, ყველა საკითხის განხილვის მზადყოფნით, ასევე იმ ეკონომიკური შესაძლებლობებით, რომლებსაც ამავე ინფრასტრუქტურების ამოქმედება თავად ირანს მისცემს“, — განაცხადა მირზოიანმა.
მინისტრმა ხაზი გაუსვა, რომ ეს შეფასება მისი ვიზიტის დროს მიღებულ შთაბეჭდილებებსა და მოსმენილს ეფუძნება. მისი თქმით, ზოგიერთი მედიასაშუალებისა და ოპოზიციური წრეების მიერ TRIPP-ის ირგვლივ შექმნილი აჟიოტაჟი რეალობას არ შეესაბამება.
მირზოიანმა აღნიშნა, რომ ირანელ კოლეგებთან პროექტის განხილვისას დაისვა სხვადასხვა საკითხი და გაეცა პასუხები, ხოლო ამ მიმართულებით მუშაობა გრძელდება.
ვიზიტის საერთო დღის წესრიგთან დაკავშირებით მინისტრმა განაცხადა, რომ ირანის ხელმძღვანელობასა და კოლეგებთან ორმხრივი ურთიერთობების მთელი სპექტრი განიხილა — პოლიტიკური დიალოგისა და ურთიერთობების სტრატეგიული ხასიათიდან დაწყებული, ეკონომიკური და ინფრასტრუქტურული საკითხებით დამთავრებული. ასევე განიხილეს საერთაშორისო და რეგიონული მოვლენები.
სატვირთო და საჰაერო გადაზიდვებთან დაკავშირებით კითხვაზე პასუხისას მირზოიანმა ხაზი გაუსვა სომხეთის მზადყოფნას, გააღრმავოს ურთიერთობები ირანთან, საერთაშორისო სანქციებით განპირობებული შეზღუდვების გათვალისწინებით.
„ჩვენ ძალიან მაღალ შეფასებას ვაძლევთ და დიდ მნიშვნელობას ვანიჭებთ ირანთან ჩვენს ურთიერთობებს და არ დავაყენებთ მათ რისკის ქვეშ“, — აღნიშნა მინისტრმა.
მისივე თქმით, სატვირთო გადაზიდვებთან დაკავშირებული საცობებისა და სატვირთო მანქანების დაგროვების საკითხი ირანული მხარის საბაჟო ზონაში შესაბამის უწყებებთან ინტენსიურად განიხილება.
მირზოიანის განცხადებით, არსებობს ტექნიკური გადაწყვეტილებები, რომელთა განხორციელებასაც უახლოეს დღეებში ელოდება.
