აშშ და ირანი უკვე მესამე დღეა თავს იკავებენ დარტყმების განხორციელებისგან. ვაშინგტონი და თეირანი ცდილობენ, სამშვიდობო მოლაპარაკებებს კიდევ ერთი შანსი მისცენ.

გაეროში აშშ-ის წარმომადგენელმა მაიკ უოლცმა განაცხადა, რომ პრეზიდენტი ტრამპი „დიპლომატიას სივრცესა და დროს უტოვებს“.

„ის დიპლომატიას შანსს აძლევს“, — განაცხადა უოლცმა CBS-ის გადაცემაში Face the Nation.

„ვნახავთ, როგორ განვითარდება მოვლენები უახლოეს დღეებში. მაგრამ არ შეცდეთ: დამატებითი სამხედრო ძალები უკვე იგზავნება რეგიონში“, — განაცხადა მან და აღნიშნა, რომ „რეჟიმმა პრეზიდენტს უნდა დაუჯეროს, როდესაც ის ამბობს, რომ ჯარები მზად არიან ბრძოლისთვის და რომ ყველა ვარიანტი კვლავ მაგიდაზე რჩება“.

კვირას ირანის არმიის წარმომადგენელმა განაცხადა, რომ თეირანმა რეგიონში ასევე შეწყვიტა „საპასუხო ოპერაციები“.

ეს მოხდა მას შემდეგ, რაც აშშ-ის მხრიდან ირანზე 13 ღამის განმავლობაში განხორციელდა უწყვეტი დარტყმები. აშშ-ის სამხედროების განცხადებით, მათი მიზანი იყო „ირანელების შესაძლებლობების შესუსტება, რომ მათ ჰორმუზის სრუტეში კომერციული ნაოსნობისთვის საფრთხე შეექმნათ“.

სრუტე ვაშინგტონსა და თეირანს შორის დაძაბულობის მთავარ კერად რჩება და ის ივნისში მხარეების მიერ შეთანხმებული „ურთიერთგაგების მემორანდუმის“ ერთ-ერთი მთავარი ელემენტი იყო.

წინასწარი შეთანხმების პირობების თანახმად, ირანი ვალდებული იყო გაეხსნა კორმუზის სრუტე, რომელიც მსოფლიოში ნავთობისა და გაზის ტრანზიტის ერთ-ერთ უმნიშვნელოვანეს მარშრუტს წარმოადგენს, და დაედასტურებინა, რომ „არ შეიძენს ან არ განავითარებს ბირთვულ იარაღს“. თავის მხრივ, აშშ დაჰპირდა ირანის საზღვაო ბლოკადის მოხსნას და თეირანის წინააღმდეგ სანქციების გაუქმებას.

თუმცა, ირანის თავდასხმებმა გემებზე ჰორმუზის სრუტეში  აშშ-ის მხრიდან ახალი დარტყმები და ირანის პორტების საზღვაო ბლოკადის განახლება გამოიწვია, რამაც საფრთხე შეუქმნა სამშვიდობო ძალისხმევას.