მშვიდობიანი კავკასიის მედია — დამოუკიდებელი ამბები საქართველოსა და რეგიონიდან.
აზერბაიჯანის ქალაქ შამახიში 22-23 ივლისს აზერბაიჯანის ორგანიზებით, ასევე COP31-ის თავმჯდომარე ქვეყნებთან — თურქეთსა და ავსტრალიასთან თანამშრომლობით, გაეროს კლიმატის ცვლილების ჩარჩო კონვენციის (UNFCCC) მოლაპარაკებების ჯგუფების თავმჯდომარეებისა და კონვენციის წევრი
აზერბაიჯანის ქალაქ შამახიში 22-23 ივლისს აზერბაიჯანის ორგანიზებით, ასევე COP31-ის თავმჯდომარე ქვეყნებთან — თურქეთსა და ავსტრალიასთან თანამშრომლობით, გაეროს კლიმატის ცვლილების ჩარჩო კონვენციის (UNFCCC) მოლაპარაკებების ჯგუფების თავმჯდომარეებისა და კონვენციის წევრი სახელმწიფოების დელეგაციების ხელმძღვანელების მონაწილეობით, მესამე არაფორმალური შეხვედრა გაიმართა.
ამის შესახებ Report-ი აზერბაიჯანის საგარეო საქმეთა სამინისტროზე დაყრდნობით იუწყება.
ღონისძიებაში მონაწილეობა მიიღო 34 ქვეყნისა და UNFCCC-ის სამდივნოს 70-ზე მეტმა წარმომადგენელმა. მონაწილე ქვეყნები წარმოდგენილი იყვნენ მინისტრების, მინისტრის მოადგილეების, სახელმწიფო მეთაურების კლიმატის საკითხებში წარმომადგენლების, UNFCCC-ის მოლაპარაკებების ჯგუფების ხელმძღვანელების, წევრი სახელმწიფოების დელეგაციების ხელმძღვანელებისა და სხვა მაღალი რანგის ოფიციალური პირების დონეზე.
წინა წლების მსგავსად, შეხვედრის მთავარი თემა კლიმატის შესახებ საერთაშორისო მოლაპარაკებების ძირითადი მიმართულებები იყო. განხილული საკითხები მოიცავდა კლიმატის დაფინანსებას, სამართლიან გარდამავალ პროცესს, კლიმატის ცვლილების შედეგებთან ადაპტაციას, სათბურის აირების ემისიების შემცირებას, ასევე COP31-ის თავმჯდომარეობის დღის წესრიგსა და „ბელენის მისიას 1,5°C-ის შესანარჩუნებლად“, რომელიც COP29-ის, COP30-ისა და COP31-ის თავმჯდომარეების „სამეულის“ მანდატის ფარგლებში ხორციელდება.
შეხვედრაზე არაფორმალურად განიხილეს მიმდინარე წლის ივნისში, გერმანიის ქალაქ ბონში გამართული UNFCCC-ის დამხმარე ორგანოების 64-ე სესიის შედეგები, მოლაპარაკებების დროს წარმოქმნილი ძირითადი სირთულეების გადაჭრის გზები და ამ საკითხების შესაძლო გავლენა COP31-ის ფარგლებში გადაწყვეტილებების მიღებაზე, რომელიც თურქეთში გაიმართება.
შეხვედრის გახსნისა და დახურვის ცერემონიებზე სიტყვით გამოვიდნენ აზერბაიჯანის საგარეო საქმეთა მინისტრის მოადგილე იალჩინ რაფიევი, COP31-ის აღმასრულებელი დირექტორი და თურქეთის გარემოს დაცვის, ურბანიზაციისა და კლიმატის ცვლილების მინისტრის მოადგილე ფატმა ვარანკი, ასევე COP31-ის მოლაპარაკებების საკითხებში თავმჯდომარის მოადგილე სალი ბოქსი.
გახსნის ცერემონიაზე ასევე ნაჩვენები იყო აზერბაიჯანის პრეზიდენტის კლიმატის საკითხებში წარმომადგენლის, მუხთარ ბაბაევის, და COP30-ის აღმასრულებელი დირექტორისა და ბრაზილიის გარემოსა და კლიმატის ცვლილების სამინისტროს ეროვნული მდივნის, ანა ტონის, ვიდეომიმართვები.
