ამერიკის შეერთებული შტატების სახელმწიფო მდივანმა მარკო რუბიომ განცხადება გაავრცელა, რომელშიც შეეხო TRIPP პროექტთან დაკავშირებით  სომხეთს, შეერთებულ შტატებსა და აზერბაიჯანს შორის მიღწეული შეთანხმების პირველ წლისთავს. „არმენპრესის“ ცნობით,რუბიოს  განცხადებაში ნათქვამია:

„ერთი წლის წინ ამ დღეს პრეზიდენტმა ტრამპმა სომხეთსა და აზერბაიჯანს შორის მშვიდობა დაამყარა: თეთრ სახლში უმასპინძლა აზერბაიჯანის პრეზიდენტ ილհამ ალიევსა და სომხეთის პრემიერ-მინისტრ ნიკოლ ფაშინიანს და მათ მიერ ისტორიული ერთობლივი დეკლარაციის ხელმოწერის მოწმე გახდა. დეკლარაციამ ბოლო მოუღო სამხრეთ კავკასიაში ათწლეულების განმავლობაში მიმდინარე კონფლიქტს და საფუძველი ჩაუყარა ტრამპის მარშრუტს საერთაშორისო მშვიდობისა და კეთილდღეობისთვის (TRIPP).

გასული თორმეტი თვის განმავლობაში შეერთებული შტატები სომხეთსა და აზერბაიჯანთან ერთად მუშაობდა იმისათვის, რომ ეს დაპირება პრაქტიკულ წინსვლად ექცია. TRIPP — მულტიმოდალური სატრანზიტო მარშრუტია, რომელიც ითვალისწინებს სარკინიგზო, საავტომობილო, ენერგეტიკული და ციფრული ინფრასტრუქტურის მოდერნიზაციას და ის ეტაპობრივად უახლოვდება იმ ნიშნულს, რომ რეალობად იქცეს. სომხეთში უკვე დაიწყო რკინიგზის საინჟინრო კვლევები, ხოლო აზერბაიჯანმა თითქმის დაასრულა სომხეთთან დასაკავშირებელი საავტომობილო გზისა და რკინიგზის მშენებლობა. მშვიდობამ შექმნა შესაძლებლობა, რომ გაღრმავდეს შეერთებული შტატების, სომხეთისა და აზერბაიჯანის ურთიერთობები, რაც ხელს შეუწყობს სამივე ქვეყნის ეკონომიკურ კეთილდღეობას. დღეს მოხარული ვარ განვაცხადო, რომ ტრანსკასპიური საწარმოების ფონდმა (Trans-Caspian Enterprise Fund) უკვე დაიწყო ფუნქციონირება. ფონდს ხელმძღვანელობს ახლად არჩეული დირექტორთა საბჭო, ხოლო მისი კაპიტალი შეადგენს 201 მილიონ აშშ დოლარს, რომელიც აშშ-ის მთავრობის მიერ არის გამოყოფილი. მიზანი კერძო სექტორის ინვესტიციების სტიმულირებაა სამხრეთ კავკასიასა და ცენტრალურ აზიაში — ტრანსკასპიური სავაჭრო მარშრუტის (შუა დერეფნის) გასწვრივ.ეს წინსვლა მეტყველებს ერთ მარტივ ჭეშმარიტებაზე: მშვიდობა და კეთილდღეობა ძლიერებენ ერთმანეთს.

„TRIPP უბრალოდ ინფრასტრუქტურული პროექტი არ არის. ის ტრანსკასპიური სავაჭრო მარშრუტის მნიშვნელოვანი რგოლია, ახალი სავაჭრო შესაძლებლობების მამოძრავებელი ძალა შეერთებული შტატებისა და სხვა ქვეყნებისთვის, აგრეთვე მაგალითი იმისა, თუ როგორ შეიძლება ეკონომიკურმა თანამშრომლობამ გაამყაროს მშვიდობა ხანგრძლივი კონფლიქტების მოგვარების შემდეგ. შეერთებული შტატები სომხეთთან და აზერბაიჯანთან თანამშრომლობის საფუძველზე შემდგომი ნაბიჯების ერთგული სრულად რჩება. ჩვენ ვულოცავთ ორივე ქვეყანას გასული ერთი წლის განმავლობაში გამოჩენილ სიმამაცესა და შორსმჭვრეტელობას და ველით შემდგომ წინსვლას სამხრეთ კავკასიაში სტაბილური და ხანგრძლივი მშვიდობის დამყარების გზაზე“, – განაცხადა აშშ-ის სახელმწიფო მდივანმა.