თურქეთის ორი F-16-ის ტიპის გამანადგურებელი თვითმფრინავი პარასკევს ლატვიის ლიელვარდეს სამხედრო ბაზაზე დაეშვა, როგორც NATO-ს ბალტიის საჰაერო პოლიციის მისიის ნაწილი, განაცხადა ლატვიის თავდაცვის სამინისტრომ.

უწყების განცხადებით, თვითმფრინავები ლატვიაში მეზობელ ესტონეთში მდებარე ამარის სამხედრო ავიაბაზიდან აფრინდნენ, სადაც თურქეთის კონტინგენტი NATO-ს მისიის ფარგლებში ბალტიის ქვეყნების საჰაერო სივრცის უსაფრთხოების უზრუნველყოფას ეხმარება.

თვითმფრინავების ჩაფრენის ღონისძიებას დაესწრნენ ლატვიის თავდაცვის მინისტრი რაივის მელნისი, თურქეთის ელჩი ლატვიაში აჰმეთ ჯემილ მიროღლუ და ლატვიის სამხედრო უწყების მაღალი რანგის წარმომადგენლები.

მელნისის განცხადებით, ლატვიაში თურქული გამანადგურებლების ყოფნა ცხადყოფს NATO-ს მზადყოფნას, დაიცვას მოკავშირეების საჰაერო სივრცე და უპასუხოს შესაძლო საფრთხეებს.

„მოკავშირეთა ძალების ყოფნა აძლიერებს ლატვიისა და NATO-ს მთელი აღმოსავლეთ ფლანგის უსაფრთხოებას და ამავდროულად მკაფიო გზავნილს აწვდის ყველას ალიანსის ერთიანობისა და ჩვენი კოლექტიური თავდაცვის სიძლიერის შესახებ“, — განაცხადა მან.

სამინისტროს ინფორმაციით, NATO-ს ბალტიის საჰაერო პოლიციის მისიის მორიგი როტაციის პასუხისმგებლობა 31 ივლისს ლიეტუვის სიაულიაის სამხედრო ავიაბაზაზე იტალიამ გადაიბარა, რომელმაც ფრანგული და რუმინული კონტინგენტები ჩაანაცვლა.

იტალიის ხელმძღვანელობით მიმდინარე როტაციას ესტონეთში, ამარის სამხედრო ავიაბაზიდან მოქმედი თურქული კონტინგენტი ეხმარება.