აზერბაიჯანში 5 აგვისტოს საზღვაო ძალების დღე აღინიშნება.

როგორც Report-ი იუწყება, აზერბაიჯანის საზღვაო ძალები 1919 წელს, აზერბაიჯანის დემოკრატიული რესპუბლიკის პერიოდში, შეიქმნა.

1919 წლის ზაფხულში, ბაქოდან გასვლისას, ბრიტანულმა ჯარებმა აზერბაიჯანის მთავრობას გადასცეს ქალაქის პორტის მართვა და სამხედრო ხომალდების ნაწილი. მათ ბაზაზე აზერბაიჯანის კასპიის სამხედრო ფლოტილია ჩამოყალიბდა. ეს ნაბიჯი ქვეყნის საზღვაო საზღვრების დაცვის უზრუნველყოფის საქმეში მნიშვნელოვან ეტაპად იქცა.

1919 წლის ბოლოს აზერბაიჯანის სამხედრო მისიამ, გენერალ იბრაჰიმ აღა უსუბოვის ხელმძღვანელობით, ქვეყნის ფარგლებს გარეთ ფლოტისთვის შეიძინა ექვსი ერთქვემეხიანი საესკადრო ნაღმოსანი, 12 კატერი-გამანადგურებელი, ექვსი წყალქვეშა ნავი, 92 გემის ქვემეხი, 10 სანაპირო ქვემეხი, უსადენო ტელეგრაფის დანადგარები და სხვა აღჭურვილობა.

1919 წლის ზაფხულში აზერბაიჯანის მთავრობამ ქვეყანაში მიიწვია თურქული წარმოშობის  ფლოტის ადმირალი, ჩრდილოეთ პოლუსზე ექსპედიციის მონაწილე ისლამოვი, რათა ეროვნული ფლოტის შექმნაში დახმარებოდა. სამხედრო ხომალდების — „ასტრაბადის“, „ყარსისა“ და „არდაჰანის“ — მეთაურობა აზერბაიჯანელ კაპიტნებს დაეკისრათ.

ფლოტის მატერიალურ-ტექნიკური ბაზის გაძლიერებისა და კადრების მომზადების გეგმები აპრილის ოკუპაციის გამო ვერ განხორციელდა. ბოლშევიკების ხელისუფლებაში მოსვლიდან მალევე აზერბაიჯანის სამხედრო ფლოტილია გაუქმდა.

საბჭოთა კავშირის დაშლის შემდეგ აზერბაიჯანში საკუთარი საზღვაო ძალების შექმნის პირობები გაჩნდა.

1992 წლის 7 აპრილს შეიქმნა აზერბაიჯანის რესპუბლიკის საზღვაო ძალების შტაბი, დაცვისა და უზრუნველყოფის ასეული. აზერბაიჯანის განკარგულებაში გადავიდა კასპიის სამხედრო ფლოტილიის 25% და უმაღლესი სამხედრო-საზღვაო სასწავლებელი.

1992 წლის 26 ივნისს საპატრულო ხომალდ „ბაქილიზე“ აზერბაიჯანის რესპუბლიკის სახელმწიფო დროშა აღიმართა.

აზერბაიჯანის მინისტრთა კაბინეტის 1996 წლის 15 ივლისის გადაწყვეტილებით, ბაქოს საზღვაო სასწავლებლის ბაზაზე შეიქმნა აზერბაიჯანის სახელმწიფო საზღვაო აკადემია — ქვეყანაში პირველი უმაღლესი საგანმანათლებლო დაწესებულება საზღვაო კადრების მოსამზადებლად.

ჰეიდარ ალიევის მიერ 1996 წელს ხელმოწერილი ბრძანებულების თანახმად, აზერბაიჯანში ყოველწლიურად 5 აგვისტოს საზღვაო ძალების დღე აღინიშნება.