ყაზახეთში კასპიის ზღვის ფსკერზე ტრანსკასპიური ოპტიკურ-ბოჭკოვანი საკომუნიკაციო ხაზის მშენებლობის მნიშვნელოვანი ეტაპი დასრულდა — წყალქვეშა კაბელმა, რომელიც მარშრუტზე აქტაუ — სუმგაითი გაიყვანეს, ყაზახეთის სანაპიროს მიაღწია.

ყაზახური სააგენტო Report-ის ბიუროს ცნობით, ქვეყნის ხელოვნური ინტელექტისა და ციფრული განვითარების სამინისტროზე დაყრდნობით, პროექტს ახორციელებენ „ყაზახტელეკომი“ და AzerTelecom International.

„ახალი მაგისტრალი დააკავშირებს ყაზახეთისა და აზერბაიჯანის ციფრულ ინფრასტრუქტურას და შექმნის პირდაპირ, მაღალსიჩქარიან მონაცემთა გადაცემის არხს აზიასა და ევროპას შორის. მოსალოდნელია, რომ ხაზი გაზრდის საერთაშორისო კავშირის საიმედოობას და გააძლიერებს ორი ქვეყნის სატრანზიტო პოტენციალს“, — აღნიშნულია ინფორმაციაში.

კაბელის საზღვაო მონაკვეთის გაყვანა 2026 წლის ივლისში დაიწყო და სამუშაოები ყოველდღე, 24 საათის განმავლობაში მიმდინარეობდა სპეციალიზებული გემის გამოყენებით, რომლის წყალწყვა 20 ათას ტონას აღემატება. სამუშაოებში 70 სპეციალისტი მონაწილეობდა.

ამჟამად მიმდინარეობს კაბელის სანაპირო ინფრასტრუქტურასთან მიერთება. შემოდგომაზე იგეგმება სახმელეთო ობიექტების მშენებლობის დასრულება, გაშვება-გამართვის სამუშაოებისა და სისტემის ტესტირების ჩატარება.

ხაზის მშენებლობასა და ექსპლუატაციაზე პასუხისმგებელია CaspiLink B.V. — „ყაზახტელეკომისა“ და AzerTelecom International-ის ერთობლივი საწარმო. პროექტი ოპერატორების საკუთარი სახსრებით ფინანსდება, საბიუჯეტო სახსრების მოზიდვის გარეშე.