სომხეთი აგრძელებს მუშაობას აზერბაიჯანთან და თურქეთთან სომხეთ-თურქეთის საზღვრის გახსნის მიზნით. როგორც „არმენპრესი“ იუწყება, ამის შესახებ სომხეთის პრემიერ-მინისტრმა ნიკოლ ფაშინიანმა ჟურნალისტებს განუცხადა.

„აზერბაიჯანს ამ საკითხთან დაკავშირებით გარკვეული შენიშვნები აქვს, და ამჟამად პროცესები სწორედ ამ ეტაპზეა. თუმცა ჩვენ ვაგრძელებთ მუშაობას როგორც აზერბაიჯანთან, ისე თურქეთთან, რათა გარკვეულ გადაწყვეტილებებს მივაღწიოთ“, — განაცხადა ფაშინიანმა.

შეგახსენებთ, რომ სომხეთმა და თურქეთმა ურთიერთობების ნორმალიზაციის პროცესი ჯერ კიდევ 2022 წელს დაიწყეს. იმ დროს მოწესრიგების პროცესში სომხეთის წარმომადგენელი სომხეთის ეროვნული კრების ვიცე-სპიკერი რუბენ რუბინიანი იყო, თურქეთის მხრიდან კი — დიპლომატი სერდარ ქილიჩი.

რუბენ რუბინიანი სომხეთის ეროვნული კრების თავმჯდომარედ 2026 წლის 3 აგვისტოს აირჩიეს, რის შემდეგაც მან განაცხადა, რომ სომხეთ-თურქეთის ურთიერთობების ნორმალიზაციის პროცესში სომხეთის წარმომადგენელი აღარ იქნებოდა. ამ დროისთვის სომხეთს ახალი წარმომადგენელი არ დაუნიშნავს.

ურთიერთობების მოწესრიგების პროცესის ფარგლებში სომხეთი და თურქეთი საწყის ეტაპზე მესამე ქვეყნების მოქალაქეებისა და დიპლომატიური პასპორტების მფლობელებისთვის საზღვრის გახსნაზე შეთანხმდნენ, თუმცა ეს შეთანხმება დღემდე არ განხორციელებულა.