შავ ზღვაში უპილოტო საფრენი აპარატით თავდასხმის ობიექტად ქცეული სატვირთო გემის, Chelsea-3-ის ბორტზე მყოფი აზერბაიჯანის რვავე მოქალაქე გადარჩენილია. ერთ-ერთი მათგანი ვარნაში ჰოსპიტალიზებულია, დანარჩენების მდგომარეობა კი დამაკმაყოფილებლად ფასდება.

როგორც Report იუწყება, ამის შესახებ აზერბაიჯანის საგარეო საქმეთა სამინისტროს პრესსამსახურის ხელმძღვანელმა აიხან ჰაჯიზადემ განაცხადა.

მისი თქმით, გემს უპილოტო საფრენი აპარატით 13 ოქტომბერს, დაახლოებით 01:30 საათზე, ბულგარეთის ქალაქ ბიალას აღმოსავლეთით, 18 საზღვაო მილის დაშორებით დაესხნენ თავს.

Chelsea-3-ის ეკიპაჟი 15 ადამიანისგან შედგებოდა, რომელთაგან რვა აზერბაიჯანის მოქალაქე იყო.

„ჩვენი ყველა მოქალაქე გადარჩენილია. ერთ-ერთი მათგანი — 1993 წელს დაბადებული რამინ რაუფ ოღლუ გამბარლი — ქალაქ ვარნის სამხედრო ჰოსპიტალში გადაიყვანეს და ექიმების მეთვალყურეობის ქვეშ იმყოფება. აზერბაიჯანის დანარჩენმა შვიდმა მოქალაქემ პირველადი სამედიცინო შემოწმება გაიარა, მათი მდგომარეობა დამაკმაყოფილებელია“, — განაცხადა ჰაჯიზადემ.

მისი თქმით, აზერბაიჯანის საგარეო საქმეთა სამინისტრო ქვეყნის დიპლომატიურ წარმომადგენლობებთან და შესაბამისი სახელმწიფოების კომპეტენტურ ორგანოებთან ერთად აღნიშნულ საკითხზე მუშაობას კოორდინაციას უწევს.

მიმდინარეობს ღონისძიებები მოქალაქეებისთვის აუცილებელი სამედიცინო და საკონსულო დახმარების გასაწევად, ასევე აზერბაიჯანში მათი უსაფრთხოდ დაბრუნების ორგანიზებისთვის.

საგარეო საქმეთა სამინისტრომ მოქალაქეებს კიდევ ერთხელ მოუწოდა, თავი შეიკავონ საომარი მოქმედებების ზონებსა და უსაფრთხოების მხრივ არასტაბილურ რეგიონებში მოგზაურობისგან.

სამინისტრომ ასევე რეკომენდაცია გასცა, მოქალაქეებმა თავი შეიკავონ სახიფათო მარშრუტებზე მოძრავ სატრანსპორტო საშუალებებზე მუშაობისგან, განსაკუთრებით შავი და აზოვის ზღვების აკვატორიებში მცურავ გემებზე.