სომხეთის მთავრობამ საზოგადოების ნდობა მშვიდობის მიმართ საბოლოო შედეგამდე — სამშვიდობო შეთანხმების ხელმოწერასა და რატიფიცირებამდე უნდა მიიყვანოს. როგორც „არმენპრესი“ იუწყება, ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა.

პრემიერ-მინისტრის განცხადებით, ეკონომიკური აქტივობა და უძრავი ქონების ბაზრის მაჩვენებლები მოქალაქეების ოპტიმიზმზე მიუთითებს. მისი თქმით, ეკონომიკა დიდწილად ადამიანების მოლოდინებსა და განწყობებთან არის დაკავშირებული. მან აღნიშნა, რომ ეკონომიკური მაჩვენებლები მშვიდობის მიმართ ნდობას გამოხატავს, საინფორმაციო სივრცეში გავრცელებული პანიკური შეფასებებისა მიუხედავად.

ფაშინიანმა ხაზი გაუსვა, რომ მშვიდობა უკვე რეალობად იქცა, თუმცა ის ჯერ სრულად ინსტიტუციონალიზებული არ არის. მისი თქმით, მთავრობამ ადამიანების მოლოდინები უნდა გაამართლოს და პროცესი ბოლომდე მიიყვანოს.

„ჩვენ შუალედურ ეტაპს მივაღწიეთ. მაგრამ ეს შუალედური ეტაპია და არა საბოლოო. ჩვენ საბოლოო ეტაპისკენ უნდა ვიმოძრაოთ“, – განაცხადა სომხეთის პრემიერ-მინისტრმა.

სამშვიდობო შეთანხმების ხელმოწერისა და რატიფიცირების აუცილებლობის კონტექსტში ფაშინიანმა ასევე ახსენა TRIPP-ის პროექტი, საზღვრის დელიმიტაცია, კომუნიკაციების გახსნა, თურქეთთან მიმდინარე პროცესი, ჩრდილოეთ-სამხრეთის გზა და „მშვიდობის გზაჯვარედინის“ კონცეფცია.

მან მთავრობის წევრებს მოუწოდა, პოლიტიკური გზავნილები და სტრატეგიები სწორედ ამ პრიორიტეტის გარშემო ჩამოაყალიბონ და ყურადღება რეალურ პრობლემებსა და პრაქტიკულ გადაწყვეტილებებზე გაამახვილონ.

ფაშინიანის განცხადებით, ყოველდღიურმა საინფორმაციო ხმაურმა მთავრობას მთავარი ამოცანისგან ყურადღება არ უნდა გადაატანინოს.