სომხეთის ანტიკორუფციულმა კომიტეტმა დაადასტურა ქვეყნის მეორე პრეზიდენტის, რობერტ ქოჩარიანისა და მისი უფროსი ვაჟის, სედრაკ ქოჩარიანის დაკავება. დაკავებები 25 აგვისტოს კორუფციულ დანაშაულებთან დაკავშირებული სისხლის სამართლის საქმის გამოძიების ფარგლებში განხორციელდა.

25 აგვისტოს დილით სამართალდამცველებმა რობერტ ქოჩარიანთან და მისი ოჯახის წევრებთან დაკავშირებულ რამდენიმე ათეულ მისამართზე ჩხრეკა და სხვა საპროცესო მოქმედებები ჩაატარეს. საგამოძიებო მოქმედებები ასევე ჩატარდა მისი უმცროსი ვაჟის, ლევონ ქოჩარიანის სახლში, რომელიც ოპოზიციური ბლოკის „სომხეთი“ წარმომადგენელი და ეროვნული ასამბლეის დეპუტატია.

სომხური მედიის ინფორმაციით, საგამოძიებო ღონისძიებები ასევე ჩატარდა სპორტულ კლუბ Orange Fitness-ში, გასართობ ცენტრ Play City-სა და ამ დაწესებულებების ხელმძღვანელების ბინებში. ასევე გავრცელდა ინფორმაცია ერევანში Toyota-ს ოფისში ჩატარებული საგამოძიებო მოქმედებების შესახებ. ამასთან, ანტიკორუფციულ კომიტეტს ჯერჯერობით არ განუმარტავს, კონკრეტულად რომელ სისხლის სამართლის საქმეს ეფუძნება გამოძიება და რა კონკრეტული ბრალდებები წაუყენეს ქოჩარიანებს.

თავდაპირველად გავრცელდა ინფორმაცია, რომ რობერტ ქოჩარიანი ეროვნული უსაფრთხოების სამსახურში გადაიყვანეს, მოგვიანებით კი — ანტიკორუფციულ კომიტეტში. მალევე უწყებამ დაადასტურა, რომ ქოჩარიანი და მისი უფროსი ვაჟი, სედრაკი, დაკავებულები არიან.

წინა დღეს, 24 აგვისტოს, პარლამენტში პრემიერ-მინისტრ ნიკოლ ფაშინიანსა და დეპუტატ ლევონ ქოჩარიანს შორის სიტყვიერი დაპირისპირება მოხდა. ფაშინიანმა განაცხადა, რომ ქოჩარიანების ოჯახის ქონების წარმომავლობა უნდა შემოწმდეს და აღნიშნა, რომ ქონება, რომელიც, მისი მტკიცებით, უკანონოდ იყო შეძენილი, სახელმწიფოს უნდა დაუბრუნდეს. საპასუხოდ ლევონ ქოჩარიანმა განაცხადა, რომ მსგავსი საკითხები სასამართლომ და არა მთავრობის მეთაურმა უნდა გადაწყვიტოს.

რობერტ ქოჩარიანი სომხეთის პრეზიდენტის პოსტს 1998-2008 წლებში იკავებდა. მანამდე, 1997-1998 წლებში, ის სომხეთის პრემიერ-მინისტრი იყო. 1994-1997 წლებში ქოჩარიანი მთიანი ყარაბაღის რესპუბლიკას ხელმძღვანელობდა, ხოლო 1992-1994 წლებში არაღიარებული რესპუბლიკის პრემიერ-მინისტრის თანამდებობას იკავებდა.