სომხეთის პრემიერ-მინისტრმა ნიკოლ ფაშინიანმა ყაზახეთის რესპუბლიკის პრეზიდენტ ყასიმ-ჟომართ თოყაევთან სატელეფონო საუბარი გამართა, – ამის შესახებ სომხეთის პრემიერ-მინისტრის აპარატი იუწყება.

ფაშინიანმა ყაზახეთის პრეზიდენტს ყურულთაის არჩევნების წარმატებით ჩატარება მიულოცა. ნიკოლ ფაშინიანმა აღნიშნა, რომ კენჭისყრის დამაჯერებელმა შედეგებმა დაადასტურა ყაზახეთის მოქალაქეების ფართო მხარდაჭერა ყასიმ-ჟომართ თოყაევის მიერ განხორციელებული რეფორმების კურსისადმი.

ყაზახეთის პრეზიდენტმა ფაშინიანს მილოცვისა და თბილი სურვილებისთვის მადლობა გადაუხადა და ყაზახეთსა და სომხეთს შორის მრავალმხრივი თანამშრომლობის განვითარების მნიშვნელობას ხაზი გაუსვა.

ორი ქვეყნის ლიდერებმა ასევე გაცვალეს მოსაზრებები რეგიონული სატრანსპორტო პროექტების განხორციელების მიმართულებით თანამშრომლობის შესაძლებლობებზე.

სომხეთის პრემიერ-მინისტრი და ყაზახეთის პრეზიდენტი შეთანხმდნენ, რომ უახლოეს მომავალში შესაბამისი შესაძლებლობების ფარგლებში დისკუსიებს გააგრძელებენ. ოქტომბერში  სომხეთში ყაზახეთის პრეზიდენტის ვიზიტია დაგეგმილი.